Татарстан мөселманнары Диния нәзарәте намаз укырга һәм Ислам дине нигезләренә өйрәтүче «Ислам. Беренче адымнар»ның 17нче сезонына тыңлаучылар җыя башлады. Әлеге курслар зур датага – Пәйгамбәребез Мөхәммәд саллаллаһү галәйһи вә сәлләмнең 1500 еллыгына багышлап уздырыла. Бу турыда Диния нәзарәте хәбәр итә.

Укулар 21 мартта башлана. Шәкертләр кыска вакытлы курс дәвамында – 7 гадәти дәрес эчендә (атнага бер тапкыр) – намаз укырга һәм Ислам дине нигезләренә өйрәнә алачак. Дәресләр – түләүсез. Курсларга язылу башланды!

• Беренче кереш дәрес 21 мартта Нәзарәт бинасында (Габдулла Тукай ур., 38) иртәнге сәгать сигездә (8:00) узачак. Язылу өчен сылтама

Дәресләрне мөфтиятнең волонтёр яшьләр хәрәкәте вәкилләре алып бара. Аерым алганда, шәкертләр госел һәм тәһарәт алырга, намаз укырга өйрәнә; гакыйдәнең асылына төшенә, сира – Мөхәммәд пәйгамбәрнең саллаллаһү галәйһи вә сәлләм тормышы белән таныша, хәләл һәм хәрам буенча дәресләр тыңлый.

Ислам динендә беренче адымнарын ясаучылар – ир-атлар һәм хатын-кызлар һәр атнашимбә 09.00-12.00 сәгатьләрдә Казанның Галиев мәчетенә (Габдулла Тукай ур., 40) җыела. Ир-атлар һәм хатын-кызлар өчен дәресләр аерым уза.

17 яшь һәм аннан өлкәнрәк укучыларны көтеп калабыз. Укулар татар һәм рус телләрендә алып барыла.

Соңгы дәрес 2 майда була. Бу көнне Коръән мәҗлесе, курсларга йомгак ясау, сертификатлар тапшыру була.

• «Ислам. Беренче адымнар» проекты – ислам дине кушканча яшәргә теләүче, әмма 5 ел дәвамында мәчет каршындагы курсларга йөрергә мөмкинлеге булмаган кешеләр өчен махсус оештырыла.
• «Ислам. Беренче адымнар» проекты Татарстан мөфтияте тарафыннан 2018 елда тормышка ашырыла башлады. Уналты сезон дәвамында әлеге курсларда 1750гә якын кеше белем алды һәм намазга басты.