Татарстанның атказанган артисты Фирдүс Тямаев «Россия 1» каналында Андрей Малаховның «Песни от всей души» тапшыруында катнашкан. Артист бу хакта социаль челтәрдәге сәхифәсендә сөйләгән. Тапшыруның эфирга кайчан чыгасы мәгълүм түгел әле.
– Бераз дулкынланам, әлбәттә, чөнки, иң көчле программага килдем. Иң мөһиме – Казаннан чәкчәк алып килдек. Бүген Малаховның «Песни от всей души» программасында катнашабыз. Дулкынланам, чөнки сөйли белмим. Зинһар, миңа теләктәшлек күрсәтегез, көлмәгез, – дип сөйләп үткән Тямаев.
Аның әйтүенчә, тапшыруны 6 сәгать чамасы төшергәннәр. Шуннан соң артист үзенең командасы белән киредән Казанга кайтып киткән.
– Үз җырларыбызны җырлатуларына ирештек. Рус һәм татар телләрендә “Сандугач”ны, «Алдама»ның бер куплетын җырладык. Әле тагын баянга «Тала-тала»ны җырламакчы идек, әмма вакыт җитмәде. Аның каравы, «Калинка» яңгырады. Барысы да бик матур узды, бүләкләр тапшырдык. Барыгызга да рәхмәт, – дип, билгеләп үткән Тямаев.